FANDOM

१२,२६२ Pages

http://www.kavitakosh.orgKkmsgchng
































CHANDER


करी गोपाल की सब होइ ।

जो अपनौ पुरुषारथ मानत, अति झूठौ है सोइ ।

साधन, मंत्र, जंत्र, उद्यम, बल, ये सब डारौ धोइ ।

जो कछु लिखि राखी नँदनंदन, मेटि सकै नहिं कोइ ।

दुख-सुख, लाभ-अलाभ समुझि तुम, कतहिं मरत हौ रोइ ।

सूरदास स्वामी करुनामय, स्याम-चरन मन पोइ ॥1॥


होत सो जो रघुनाथ ठटै ।

पचि-पचि रहैं सिद्ध, साधक, मुनि , तऊ न बढ़ै-घटै ।

जोगी जोग धरत मन अपनैं अपनैं सिर पर राखि जटै ।

ध्यान धरत महादेवऽरु ब्रह्मा, तिनहूँ पै न छटै ।

जती, सती, तापस आराधैं, चारौं बेद रटै ।

सूरदास भगवंत-भजन बिनु, करम-फाँस न कटै ॥2॥


भावी काहू सौं न टरे ।

कहँ वह राहु, कहाँ वै रवि ससि, आनि सँयोग परै ।

मुनि बसिष्ट पंडित अति ज्ञानी, रचि-पचि लगन धरै ।

तात-मरन, सिय हरन, राम बन-बपुधरि बिपति भरै ।

रावन जीति कोटि तैंतीसौ, त्रिभुवन राज करै ।

मृत्युहिं बाँधि कूप मैं राखै, भावी-बस सो मरै ।

अरजुन के हरि हुते सारथी, सोऊ बन निकरै ।

द्रुपद-सुता कौ राजसभा, दुस्सासन चीर हरै ।

हरीचंद सो को जगदाता, सो घर नीच भरै ।

जौ गृह छाँड़ि देस बहु धावै, तउ सग फिरै ।

भावी कैं बस तीन लोक हैं, सुर नर देह धरै ।

सूरदास प्रभु रची सु ह्वै है, को करि सोच मरै ॥3॥


तातैं सेइयै श्री जदुराइ ।

संपति बिपति, बिपतितैं संपति, देह कौ यहै सुभाइ ।

तरुवर फूलै, फरै, पतझरै, अपने कालहिं पाइ ।

सरवर नीर भरै भरि, उमड़ै सूखै खेह उड़ाइ ।

दुतिया चंद बढ़त ही बाढ़े , घटत-घटत घटि जाइ ।

सूरदास संपदा-आपदा, जिनि कोऊ पतिआइ ॥4॥

Ad blocker interference detected!


Wikia is a free-to-use site that makes money from advertising. We have a modified experience for viewers using ad blockers

Wikia is not accessible if you’ve made further modifications. Remove the custom ad blocker rule(s) and the page will load as expected.

Also on FANDOM

Random Wiki